ٹوکیو : جاپان کی معروف گاڑی ساز کمپنی “ٹویوٹا” موٹر ماحول دوست گاڑیوں کی تیاری کی جانب منتقل ہوتی دیگر کمپنیوں کو ہائیڈروجن سے چلنے والی گاڑیوں کی اپنی ٹیکنالوجی فروخت کرنے کا منصوبہ رکھتی ہے۔
یہ بڑی گاڑی ساز کمپنی اپنی مِیرائی نامی سیڈان کار کے لیے وضع کردہ ڈبے کی شکل کا ماڈل فروخت کے لیے پیش کرے گی جس میں فیول سیل شامل ہوں گے۔ ایندھن کے یہ سیل، ہائیڈروجن اور آکسیجن استعمال کرتے ہیں اور ان سے دھوئیں کے بجائے صرف پانی کا اخراج ہوتا ہے۔
ٹویوٹا ترجمان کے مطابق مذکورہ ٹیکنالوجی کی فروخت کا آغاز موسم بہار سے ہوسکتا ہے، اس ٹیکنالوجی کی مدد سے ٹرک، بسوں اور ٹرینوں کو چلانے کے علاوہ اسے بجلی پیدا کرنے کے لیے بھی استعمال کیا جا سکتا ہے۔
جاپان مستقبل کے ایندھن کے طور پر ہائیڈروجن کو فروغ دے رہا ہے۔ ٹویوٹا انتظامیہ کو امید ہے کہ اس کے تازہ ترین اقدام سے ہائیڈروجن اسٹیشنوں جیسے بنیادی ڈھانچے کی تشکیل میں مدد ملے گی۔
