139

صدر مملکت دی چیف الیکشن کمشنر نوں ہنگامی اجلاس دی دعوت

اسلام آباد( پنجابی میڈیا)صدر مملکت ڈاکٹر عارف علوی نے چیف الیکشن کمشنر نوں خط لکھیا اے جس وچ صدر مملکت ولوں چیف الیکشن کمشنر نوں الیکشن بارے ہنگامی اجلاس دی دعوت دتی گئی اے۔صدر مملکت نے سکندر سلطان راجہ نوں 20 فروری 2023 نوں ایوان صدر مشورے لئی دعوت دتی ا ے، خط دے مطابق ایکٹ دے تحت صدر مملکت عام الیکشن دی تریخ دا اعلان کمیشن نال مشورے توں بعد کرن گے،خط وچ صدر مملکت نے آکھیا اے کہ ایس معاملے اُتے لہور ہائی کورٹ دے فیصلے تے سپریم کورٹ دے حالیہ مشاہدات وَرگی کجھ اہم پیش رفت ہوئی۔صدر مملکت عارف علوی نے الیکشن کمیشن ولوں بے حسی اُتے نراضگی دا اظہار کردیاں ہویاں آکھیا کہ الیکشن کمیشن نے اجے تک پہلے خط دا جواب نہیں دتا، اوہناں نے آکھیا کہ میں بے چینی نال انتظار کر رہیا سی کہ کمیشن اپنے آئینی فرائض دا احساس کرے گا تے اوس دے مطابق کم کرے گا۔عارف علوی نے آکھیا کہ اہم معاملے اُتے الیکشن کمیشن دے افسوسناک رویئے اُتے انتہائی مایوسی ہوئی، آئین دے تحفظ تے دفاع دی اپنی آئینی ذمہ داری دا احساس کردیاں ہویاں چیف الیکشن کمشنر نوں اپنے دفتر وچ الیکشن اُتے مشاورت لئی ہنگامی ملاقات لئی مدعو کردا ہاں۔

اس خبر پر اپنی رائے کا اظہار کریں

اپنا تبصرہ بھیجیں