اسلام آباد : سوشل میڈیا پر گستاخانہ مواد کی تشہیر کیس میں سزائے موت پانے والے تینوں مجرمان نے اپنی سزا کے خلاف اپیل اسلام آباد ہائیکورٹ میں دائر کردی۔
تفصیلات کے مطابق انسداد دہشتگردی عدالت اسلام آباد سے توہین رسالت کے جرم میں سزائے موت پانے والے تینوں مجرمان نے اپنی سزائے موت کے خلاف اپیل دائر کردی ، مجرم عبدالوحید، رانا نعمان رفاقت اور ناصر احمد سلطانی نے بذریعہ سپرنٹینڈنٹ اڈیالہ جیل اپیل اسلام آباد ہائیکورٹ میں دائر کی۔
رجسٹرار آفس نے مذکورہ مجرمان کی سزائے موت کنفرم کرنے کے لئے انسداد دہشت گردی عدالت کی جانب سے کیپیٹل سینٹنس ریفرنس کی سماعت کے لئے بینچ تشکیل دینے کے لئے فائل چیف جسٹس کو بھیج دی ہے۔
چیف جسٹس اسلام آباد ہائی کورٹ انسداد دہشت گردی عدالت اسلام آباد کی جانب سے بھیجے گئے کیپیٹل سینٹنس ریفرنس اور مجرمان کی جیل اپیلوں کی آئندہ ہفتے سماعت کے لئے بنچ تشکیل دیں گے۔
یاد رہے انسداد دہشت گردی کی عدالت نے سوشل میڈیا پر گستاخانہ مواد کی تشہیر سے متعلق کیس میں تین ملزموں کو سزائے موت سنا دی تھی، ا تحریری فیصلے میں کہا گیا تھا کہ 3 مجرموں کو سزائے موت سنائی جاتی ہے، تینوں مجرموں کودفعہ 295سی کے تحت سزا سنائی گئی جبکہ مجرم انواراحمدکو 10سال قید،ایک لاکھ جرمانےکی سزا دی جاتی ہے۔
