39

منٹو براڑ دی کتاب ”کینگرونامہ” دا مُکھ وکھالی اکٹھ

پنجابی کلچرل ایسوسی ایشن سائوتھ آسٹریلیا دے صدر مشہور لکھاری منٹو براڑ دی کتاب ”کینگرو نامہ” دا مکھ وکھالی دا اکٹھ لہور وچ ہویا۔ پنجاب ہائوس وچ ہون والے اکٹھ وچ منٹو براڑ دی ہڈ بیتی وارتا تے گل بات ہوئی۔ اکٹھ دی صدارت پنجابی سوشل موومنٹ دے چیئرمین محمد ظاہر بھٹی نے کیتی تے اچیچے پروہنے پنجابی زبان تحریک دے سربراہ الیاس گھمن سی۔ منٹو براڑ دی کتاب گرمکھی وچ چھپی سی جس نوں بابا فرید بک فائونڈیشن نے شاہ مکھی وچ چھاپیا اے۔
لپی انتر آصف رضا نے کیتا اے۔ اکٹھ وچ تقریر کردے ہوئے ڈاکٹر کلیان سنگھ نے منٹو براڑ دا تعارف کروایا تے اوہناں دے کم بارے دسیا۔ اوہناں نے کہیا کہ منٹو براڑ صرف اک لکھاری ای نہیں بلکہ پوری داستان اے۔ انڈیا توں آسٹریلیا تیکر اوہناں دا پندھ تے پنجابی دی سیوا ایس کتاب وچ دِسدی اے۔ منٹو براڑ لکھاری ہون دے نال اک حساس انسان وی اے جس دا اظہار اوہناں نے اپنی کتاب وچ تھاں تھاں تے کیتا اے۔
پنجابی سوجھوان تے لکھاری فاروق ندیم نے کینگرونامہ تے بھرویں گل بات کیتی۔ اوہناں نے کتاب دے کئی صفحے پڑھ کے سنائے تے اوہناں اتے تبصرہ وی کیتا۔ اوہناں نے منٹو دی کتاب وچ ورتی جان و الی سادہ زبان دا ذکر وی کیتا تے عام بندے دے حالات بارے منٹو دی فکر نوں وی کھول کے بیان کیتا۔فاروق ندیم نے کہیا کہ منٹو دی کتاب پنجابی دیاں قیمتی کتاباں وچ وادھا اے۔
رویت ہلال ریسرچ کونسل دے چیئرمین اعجاز مفتی نے کینگرو اکھر دا مطلب وی دسیا تے اوس مطلب راہیں ایہہ وی دسیا کہ وڈا بندا اوہی ہندا اے جیہڑا سب کجھ جان کے وی ایہو ای آکھے کہ میں کش نہیں جاندا تے منٹو وی وڈا بندہ اے جیہڑا سب کجھ جان کے وی کہندا اے کہ میں کش نہیں جاندا۔
پنجابی رسالہ ترسیل دے ایڈیٹر تے مشہور شاعر مشتاق قمر نے کینگرو نامہ وچ انسانی درد تے پنجاب دی محبت دے تال میل بارے گل کیتی تے کہیا کہ منٹو براڑ دی کتاب اک سچے پنجابی دی کتاب اے۔ اوہناں دی کتاب وچ لکھے۔ شعر اوہناں دے جذبات دی ترجمانی کردے نیں۔
صدر پنجاب ہائوس ندیم رضا نے پنجاب ہائوس دی کہانی تے ایس دے بنان دا مقصد بیان کیتا تے کہیا کہ پنجاب ہائوس مدثر اقبال بٹ دی لمی جدوجہد تے محنت دا ثمر اے۔
مشہور صوفی گائیک اقبال باہو دے فرزند ندیم اقبال باہو نے سلطان باہو دا کلام سنا کے محفل نوں مہکا دتا۔ کوک پاکستان کوک دے چیئرمین حسنین بھٹی نے کینگرو نامہ تے تنقیدی مضمون پیش کیتا تے منٹو براڑ دی ایس وارتا تے جھات پائی۔ اوہناں نے منٹو براڑ دے انسانی طرز بیان دی صلاحنا کیتی تے کہیا کہ ایس طراں دیاں کتاباں پنجابی دے ودھا واسطے بہت ضروری نیں۔
سینئر پنجابی سیوک تے مشہور براڈ کاسٹر نظام دین دی نونہہ غزالہ نظام نے اپنے مخصوص انداز وچ گل بات کیتی تے محفل نوں خوب ہسایا تے نال ای منٹو دی صلاحنا وی کیتی۔ پنجاب یونیورسٹی دے بزرگ استاد سعادت علی ثاقب نے وی اکٹھ وچ اچیچی رلت کیتی تے اک استاد دی نگاہ نال کتاب نوں ویکھیا۔ گل بات مگروں اوہناں نے میاں محمد بخش دا کلام وی سنایا۔
چیئرمین پنجابی میڈیا گروپ مدثر اقبال بٹ نے کہیا کہ پنجاب ہائوس پنجابی دی سیوا واسطے کم جاری رکھے گا۔ منٹو براڑ دی کتاب چھاپنا ساڈے لئی مان دی گل اے تے اگانہہ وی ایہہ سلسلہ جاری رکھاں گے۔
پنجابی زبان تحریک دے صدر الیاس گھمن نے پنجاب دی ونڈ تے منٹو دے خاندان دے دکھانت دی کہانی سنائی تے دسیا کہ کس طرح منٹو دے گھر والیاں نے منٹگمری شہر دی یاد وچ منٹو دا نام رکھیا تے اوہ خلش منٹو دی لکھتاں وچ وی لبھدی اے۔
پنجابی سوشل موومنٹ دے چیئرمین محمد ظاہر بھٹی نے منٹو براڑ دی کتاب تے وی گل کیتی تے پنجاب پنجابی دے تحفظ دی خاطر ہر قربانی دین دا اعلان وی کیتا تے کہیا کہ منٹو دی کتاب وی پنجاب دے تحفظ وچ اپنا کردار ادا کرے گی۔ اکٹھ دے آرگنائزر میاں آصف علی نے کہیا کہ منٹو براڑ دی کتاب دی مکھ وکھالی کروانا وڈے لئی اعزازدی گل اے۔ منٹو براڑ نے ساڈے سدے تے آ کے ساڈا مان ودھایا اے۔
منٹو براڑ نے کہیا کہ ایہہ دن میرے واسطے بڑا مان جوگ اے۔ میرا جنا آدر لہور وچ کیتا گیا اے ایہہ میرے لئی اک سفنا سی۔ میری کتاب دی مکھ وکھالی دا اکٹھ کرا کے لہوریاں نے مینوں مل لے لیا اے۔
اکٹھ وچ حکیم آصف گجر’ بلال مدثر بٹ’ افتخار مترا’ عمیر منظور’ نذیر جوئیہ تے ہور کئی پنجابی سیوک وی موجود سی۔ اخیر تے منٹو براڑ دے سر تے پگ رکھی گئی تے کیک وی کٹیا گیا۔ سب سجناں نے رل کے کتاب دی مکھ وکھالی کروائی۔

اس خبر پر اپنی رائے کا اظہار کریں

اپنا تبصرہ بھیجیں