12

قلم فائونڈیشن دے پربندھ ہیٹھ ”ورلڈ پنجابی کانفرنس کینیڈا2022” دی تعارفی تقریب

دس سال توں کامیاب ورلڈ پنجابی کانفرنسز کروان اتے جسپیر سنگھ بوپارائے مبارکباد دے مستحق نیں:مدثر اقبال بٹ
قلم فائونڈیشن تے پنجاب ہائوس دے تعلقات وچ وادھا چنگی گل اے:ڈاکٹر کلیان سنگھ کلیان’ ڈاکٹر نبیلہ رحمن
اسیں پنجابی بولی ‘ ادب تے رہتل دے ودھا لئی ورلڈ پنجابی کانفرسنز دا انعقاد باقاعدگی نال کر رہے آں:جسبیر سنگھ بوپارئے
قلم فائونڈیشن تے پنجاب ہائوس دی پنجابی زبان تے ادب لئی خدمات ناقابل فراموش نیں:حمیداللہ بھٹی دا تقریب نال خطاب

لہور (سٹاف رپورٹر) قلم فائونڈیشن کینیڈا دے پربندھ ہیٹھ پچھلے دیہاڑ پنجاب ہائوس وچ ستمبر 2022وچ کینیڈا وچ ہون والی ورلڈ پنجابی کانفرنس دے حوالے نال تعارفی تقریب دا پربندھ کیتا گیا۔ تقریب دی صدارت پنجابی ورلڈ کانفرنس کینیڈا دے صدر جسبیر سنگھ بوپارائے نے کیتی۔ اُچیچے پروہنیاں وچ پروفیسر ڈاکٹر نبیلہ رحمنٰ ،طاہرہ سرا، الیاس گھمن ،نعیم مسعود ،وائس چانسلر بابا گورونانک یونیورسٹی محمد افضل ،جان کاشمیری، حمید اللہ بھٹی تے بابا نجمی شامل سن۔تقریب دی میزبانی پنجابی یونین دے چیئرمین مدثر اقبال بٹ تے وائس چیئرمین بلال مدثر بٹ نے کیتی۔ تقریب نال خطاب کردے ہوئے پروفیسر ڈاکٹر نبیلہ رحمن نے آکھیا کہ قلم فائونڈیشن پنجابی دے فروع لئی مثالی کم کر رہی اے۔ اوہناں نے آکھیا کہ قلم فائونڈیشن دی بنیاد درشن سنگھ نے رکھی سی۔ اوہناں نے پنجابی وچ لکھن والیاں نوں اک پلیٹ فارم اتے اکٹھا کرن لئی بہت کم کیتا سی اوہناں دی بیگم نے اوہناں مگروں اوہناں دے مشن نوں جاری رکھیا تے ہن جسبیر سنگھ بوپارائے بڑی خوبصورتی نال اوہناں دے مشن نوں اگے ودھا رہے نیں۔ پروفیسر ڈاکٹر کلیان سنگھ کلیان نے آکھیا کہ روشن سنگھ دی قلم فائونڈیشن تے پنجاب ہائوس دے درمیان تعلقات وچ وادھا ہو رہیا اے تے جسبیر سنگھ بوپارائے دی موجودگی نال اوہناں تعلقات وچ مضبوطی آ رہی اے ۔ ایس تقریب دا مقصد کینیڈا وچ 2توں 4ستمبر 2022وچ ہون والی ورلڈ پنجابی کانفرنس دے دعوت نامیاں دی تقسیم اے۔ مسلم لیگ ق نال تعلق رکھن والی اہم شخصیت حمیداللہ بھٹی دا آکھنا سی کہ پنجاب ہائوس تے قلم فائونڈیشن رل کے دنیا بھر دے پنجابیاں لئی اپنی خدمات سرانجام دے رہے نیں۔ میرے لئی فخر دی گل اے کہ اسیں وی اوہناں دے نال رل کے اپنا کردار ادا کر رہے آں۔ جسبیر سنگھ بوپارائے نے آکھیا کہ درشن سنگھ نے قلم فائونڈیشن دا جہڑا پودا لایا سی اج تناور درخت بن گیا اے تے پنجابی دے فروغ لئی ورلڈ پنجابی کانفرنسز دا باقاعدہ پربندھ کیتا جا رہیا اے۔ ایس سال ایہہ کانفرنس 2ستمبر توں 4ستمبر تک ہووے گی۔ اج میں اوہدے دعوت نامے تقسیم کرنے نیں جنہاں لوکاں نے پنجابی لئی کوئی خدمات انجام دتیاں نیں اوہناں لئی دعوت اے کہ اوہ آن تے کانفرنس وچ رلت کرن۔ مینوں اپنے کاغذات پہنچا دین تاں جے قنونی لوازمات پورے کیتے جا سکن۔ اوہناں نے آکھیا کہ ڈاکٹر درشن سنگھ نے اپنی وفات توں پہلاں قلم فائونڈیشن دی ذمہ واریاں اپنی بیگم دے سپرد کیتیاں سن تے اوہناں نے ایہہ ذمہ واریاں میرے موہنڈیاں اتے پا دتیاں جنہاںنوں نبھان وچ پروفیسر ڈاکٹر نبیلہ رحمن بہت کم کر رہیاں نیں۔ اوہناں نے آکھیا کہ جدوں میری ملاقات مدثر اقبال بٹ نال ہوئی تے ایہہ لگیا ای نہیں کہ اوہناں نال پہلی ملاقات اے۔ا وہناں نے پنجاب ہائوس بنا کے پنجابی دی ترقی دی راہواں کھول دتیاں نیں۔ میزبان مدثر اقبال بٹ نے آکھیا کہ قلم فائونڈیشن پنجابی تے پنجابی لکھن والیاں لئی بہت اہم کم کر رہی اے۔ ایس موقع تے جسبیر سنگھ بوپارائے نے مدثر اقبال بٹ’ حمیداللہ بھٹی’ ڈاکٹر نبیلہ رحمان’ طاہرہ سرا’ اصغر پہلوان تے ڈاکٹر محمد افضل نوں ورلڈ پنجابی کانفرنس وچ رلت دے دعوت نامے دتے۔ تقریب دے اختتام اتے جسبیر سنگھ بوپارائے نے بھارتی پنجاب وچ پنجابی دے فروغ لئی کم کرن والی اک تنظیم سانجھا پنجاب ولوں پنجابی میڈیا گروپ دے چیئرمین مدثر اقبال بٹ نوں چادر تے تعریفی سرٹیفکیٹ پیش کیتا۔

اس خبر پر اپنی رائے کا اظہار کریں

اپنا تبصرہ بھیجیں